ආගම,කුලය සහ විවාහය

විවාහය යන්න විවිධ සංස්කෘතීන්හි විවිධ අයුරෙන් සංකල්ප ගත කෙරුණු දෙයක් වන අතර ප්‍රධාන වශයෙන් බටහිර සහ පෙරදිග සංස්කෘති සැළකුවහොත් අපට දැකිය හැකි මූලික වෙනස්කම් කිහිපයක් වේ. ඉතා සරළව විවාහය යන්න ස්ත්‍රියක් හා පුරුෂයෙක් අතර සිදුවන නෛතික බැඳීමක් ලෙස අර්ථ දැක්වුවහොත් කිසිවෙකු අමනාප නොවනු ඇතැයි සිතමි.එනම් මෙය දෙදෙනෙකු අතර සිදුවන බැඳීමකි. නමුත් විවාහය හුදෙක් දෙදෙනෙකු අතර සිදුවන බැඳීමක් ලෙස විශ්ව සාධාරණ අර්ථ දැක්වීමක් දීම කෙතරම් වලංගුද? පෞද්ගලිකත්වය හා වෙන්කිරීම ප්‍රධාන ලක්ෂණ වන බටහිර සංස්කෘතිය තුළ දරුවන් වැඩිවියට පත් වූ පසු දෙමව්පියන්ගෙන් වෙන් වීමත් පසුව ඔවුන් ඔවුනට රිසි සේ ස්වාධීනව තීරණ ගැනීමත් යන්න ඉතාම සුලබ දෙයකි.එවන් වූ පසුබිමක් තුළ විවාහය යන්න දෙදෙනෙකු අතර සිදුවන විවාහයක් ලෙස ගැනීම පුදුම විය යුතු දෙයක් නොවේ. නමුත් පෞද්ගලිකත්වය මෙන්ම සාමුහිකත්වයද අගයන එකක් එකිනෙක බැඳී පවතින බොහෝ පෙරදිග සංස්කෘතීන් තුළ විවාහය යන්නට ඉහත අර්ථ කථනය දීම ප්‍රමාණවත් නැත.පෙරදිග සංස්කෘතීන් වල විවාහය යනු හුදෙක් දෙදෙනෙකු අතර සිදුවන විවාහයක් නොව පවුල් දෙකක් අතර සිදුවන විවාහයක් බව වරෙක මහචාර්ය නලින් ද සිල්වා පවසා ඇති බව මට මතකය.එහිදී දරුවන් දෙමව්පියන්ගෙන් වෙන්වීමක් නොවන අතර විවාහ වූ පසුවද දෙමව්පියන් සිය දරුවන් සමඟ ජීවත්වනු දැකිය හැක.නමුත් දරුවන්ට පෞද්ගලික වු විවාහ ජීවිතයක් නැතුවාද නොවේ. මෙකී ලක්ෂණ හේතු කොටගෙන දෙමව්පියන් වුවද සිය දරුවගේ අනාගත සහකරුවා හෝ සහකාරිය පිළිබඳ යම් සැළකිල්ලක් දක්වනු ලැබේ. එබැවින් දරුවන්ගේ විවාහයට හුදෙක් දරුවන්ගේ ආකල්ප වලට අමතරව දෙමව්පියන්ගේ ආකල්පද යම් බලපෑමක් කරනු ලබයි. මෙය පැහැදිලිවම සංස්කෘතික ලක්ෂණයක් වන අතර කෙනෙකු  එය බටහිර සංස්කෘතියට සාපේක්ෂව පෙරදිග සංස්කෘතීන් වල පසුගාමී හෝ අයහපත් ලක්ෂණයක් ලෙස හුවා දැක්වීමට යාම මෝඩකමකි.

ආගම සහ කුලය යන්නද විශේෂයෙන් පෙරදිගයන් අතර පවතින්නා වූ ,විවාහය යන කාරණාවට අදාළ කරගන්නා දේවල් වේ.අප රටෙහිද මෙය අඩු වැඩි වශයෙන් බොහෝදෙනා අතර දැකිය හැකි සුලබ කාරණවක් වේ. ඒ වගේම විවිධ පුද්ගලයන් අතර මේ පිළිබඳ විවිධ වූ විවේචනද දැකිය හැක.කෙනෙකු ආගම විවාහයට බලපෑමක් කිරීම අනුමත කළද කුලය විවාහයට බලපෑම් කිරීම අනුමත නොකරයි. තවත් කෙනෙක් ආගම මෙන්ම කුලයද විවාහය සඳහා අදාළ කරගනියි. නමුත් මා දන්නා ආකාරයට සමහරෙක් ඉහත පළමු පිරිසට වඩා දෙවන පිරිස කෙරෙහි අවඥා සහගත ආකල්පයක් දරණු ලැබේ. අද පුවත්පත් වල පළවන මංගල යෝජනා වලද කුලය යන්න අඩුවක් නැතුව සඳහන් කරනු දැකිය හැක.මා පෞද්ගලිකව මෙයට විරුද්ධ නැත්තේ අතීතයේ සිටම අප අතර කුල ක්‍රමයක් පැවතී ඇති බැවිනි. නමුත් එයින් අදහස් කරන්නේ මා කුලභේදයක් අනුමත කරන බව නොවේ.අද අප අතර කුලභේදයක් සුළුවෙන් හෝ පවතීනම් එය ඇතිවුණේ මහනුවර යුගයේ එනම් ඉංග්‍රීසි පාලන සමයේ බව අමතක නොකළ යුතුය. කුල ක්‍රමය යනු අතීතයේ සිට සිංහලයන් සිය රාජකාරී කටයුතු පාරම්පරිකව පවත්වාගෙන ආ ක්‍රමයක් වන අතර ඒ තුළ ඉන්දියානු කුළ පීඩනය වැනි දෙයක් දක්නට තිබුණේ නැත. නමුත් විවාහය වැනි කාරණා වලදී සිංහලයන් බොහෝදුරට කුලය යන්න යොදාගත්තේ හුදෙක් කුල ගෝත්‍රික අදහසකින් නොව පෘතග්ජන කාටත් පොදු "නම්බුව" යන මානසික ආකල්පය මත යැයි සිතිය හැක. මෙහි වැරද්දක් නැතැයි මා පවසන්නේ කෙනෙක් ආගම යන්න විවාහයට අදාළ කරගන්නේ කවර ප්‍රමාණයකින්ද ඒ හා ප්‍රමාණයකින්ම තවත් අයෙකුට කුලය යන්නද විවාහයට අදාළ කරගැනීමේ අයිතියක් ඇති බැවිනි. විශේෂයෙන් සමහර දේවවාදී අදහස් දරණ ඇත්තන් බොහෝවිට තම ආගමික අදහස් විවාහය කෙරෙහි ඉතා ඉහළින් අනුගමනය කරන අතරම කුලය යන්න විවාහයට අදාළකරගන්නා කෙනෙකු කෙරෙහි අවඥා සහගතව බලයි.මෙවැනි බොහෝදෙනෙකුට අමතක වන කරුණක් වන්නේ ආගම මෙන්ම කුලයද මිනිසාගේම නිර්මාණ වන බවය. එවැනි තත්වයක් මත ආගම යන්න විවාහයට තීරණාත්මක දෙයක් ලෙස සළකන කෙනෙකු කුලය යන්න විවාහයට තීරණාත්මක දෙයක් ලෙස සළකන කෙනෙකුට වඩා උසස් වන්නේ කෙසේද?

මෙය වටහාගත් සිංහලයන් බොහෝදෙනෙක් මෙරට සිටින බව ඇත්තකි.නමුත් සමහර උගතුන් පවා මෙය තේරුම් ගන්නේ බටහිර සංස්කෘතියට සාපේක්ෂව මේ දෙස බැලීමෙනි.මෙහිදී කිවයුතු වැදගත් දේ වන්නේ ආගමේ නමයෙන් හෝ කුලයේ නාමයෙන් හෝ සමාජයේ පීඩනයක් ඇතිකිරීම පැහැදිලිවම හෙළා දැකිය යුතු බවය. නමුත් පුද්ගල ආකල්ප මත තීරණය වන විවාහය වැනි දෙයකට ආගම, කුලය යන්න යොදාගැනීම ප්‍රශ්නයක් නොවේ. කෙනෙකු ආගම සහ කුලය යන දෙකම විවාහය සඳහා බැහැර කරන්නේනම් එයද ඒ පුද්ගලයාගේ තවත් ආකල්පයක් පමණක්ම වේ.ඒ හැර ඔහු/ඇය අනෙකාට වඩා උසස් කෙනෙකු ලෙස සිතාගැනීමට තරම් එය නිර්ණායකයක් වන්නේ නැත. වර්තමානයෙ බොහෝ විවාහ අපේක්ෂිත තරුණ තරුණියන් ආගමික හා කුල අදහස් නොසළකනවා විය හැක.නමුත් ඔවුන්ට සිය දෙමව්පියන්ගෙන් ස්වායක්ත විය නොහැක.පෙර කී පරිදි අප වැනි රටවල විවාහය යනු පවුල් දෙකක අතර සිදුවන්නකි,.එවිට දෙමව්පියන්ගේ ආකල්පද විවාහයට එකතු වේ. අදටත් මෙරට වැඩිහිටියන්ගේන් බොහෝදෙනා ආගම සහ කුලය සැලකිල්ලට ගනු ලැබේ.මේ අපේ සංස්කෘතියයි.මෙය කිසිසේත්ම බටහිර සංස්කෘතිය සමඟ සැසඳීමට තරම් දෙයක්වත් බටහිර සංස්කෘතිය අප සංස්කෘතියට වඩා උසස් ‍යැයි කීමට තරම් දෙයක්වත් නොවේ.

සාරාංශයක් ලෙස මා මෙහිදී කීමට තැත් කළේ කෙනෙකු  පීඩනයකට ලක්නොවනතාක්  විවාහය යන කාරණාවේදී ආගම කුලයට වඩා සුවිශේෂි නොවන්නාසේම ආගම්,කුල නොසළකා හැරීම එසේ සැලකීමට වඩා සුවිශේෂී වන්නේද නැත.එය හුදෙක් සංස්කෘතික වෙනසකි.