Monday, September 21, 2015

මට මෙය නොලියා බැරිය

මේ ඇය ගැනයි.ඇය කවුරුදැයි මා හරිහැටි නොදනී.නමුත් මා ඇයව නොදන්නවාද නොවේ.බැලූ බැල්මට එය ප්‍රේහෙලිකාවක් නොවේදැයි කෙනෙකුට සිතිය හැක.කතාවේ පහසුව උදෙසා මා ඇයට වත්සලා යැයි පවසන්නම්.නමුත් ඇගේ නම වත්සලා නොවේ.ඇගේ සත්‍ය නම මට මේ මොහොතේ හෙළි කළ නොහැක.දැනට වසරකට පමණ පෙරාතුව හදිසියේ සිතට වැදුණු යම් හැඟීම් මාත්‍රයක් මත කෙමෙන් කෙමෙන් වර්ධනය වූද මොහොතින් මොහොත ආවර්ජනය කරගත්තාවූද  සිතුවිලි ලෝකය දැන් නිශ්චිත තැනකට පැමිණ ඇත.ඒ මා ඇයට ප්‍රේම කරන බවද?
"කෙනෙක් ප්‍රේමයට සුදුසු වනතාක් ප්‍රේමය ඔහුට හමු නොවේ.නමුත් ඔහු ප්‍රේමයට සුදුසු වූ පසු ප්‍රේමය ඔහුව සොයාගෙන එයි.අවදි වෙයි.ගත සිත කළඹවයි" මේ ප්‍රසිද්ධ කියමනට අනුව මා දැන් ප්‍රේමයට සුදුසුද?මගේ ගත සිත අවදියෙන්ද?මා දැන් මෙය ලියන්නේ ඇයි?මා තනිව මගෙන්ම විමසයි.

කිසිදිනක මූණට මූණ හමුනොවුණු, සිනා සී නැති,එකදු වචනයක්වත් කතා කර නැති ඇය කෙරෙහි මට ප්‍රේමයක් හට ගත හැකිද?
මගේ සිත ඇදී යයි අතීතයකට.ඒ 2007 වර්ෂයයි.පාසලේ උසස් පෙළ සිසුන්ගේ ප්‍රතිඵල නිකුත් වී ඇති වකවානුවකි.ප්‍රතිඵල ලැබී සොම්නසින් වැජබෙන හා දොම්නසින් ලතැවෙන  සිසුන් අතර තව වසරක් ඇතුළත උසස් පෙළ ලිවීමට සිටින මන් ගැනද යම් යම් අනාගත චිත්ත රූප මැවෙන්න පටන් ගත්හ.මේ සිතුවිලි අතර අපූරු (පෙර නොවූ විරූ) සිතිවිල්ලක් පහළ විය. වත්සලා මාගේ වයසේ උසස් පෙළ වාණිජ විද්‍යා හදාරපු සිසුවියක් විය. ඇය පාසලේ ජනප්‍රිය සිසුවියක්ද වේ.ඒ ඇගේ හැකියාවන් නිසාය.මා ඇයව නොදන්නවා නොවේ යැයි පැවසීමටත් මෙය එක් හේතුවකි.ඇගේ චරිතවත් බව,විවිධ ක්ෂේත්‍රයන් තුළ ඇය පාසලේ දක්වපු දක්ෂතා පිළිබඳ මට යම් චිත්‍රයක් තිබුණි.මේ අවබෝධය නිසාම හෝ වෙන යම් හේතුවක් නිසා හෝ ඇය ලබන වසරේ උසස් පෙළ වාණිජ අංශයෙන් ගම්පහ දිස්ත්‍රික්කයේ ප්‍රථම ස්ථානය ලබාවි යන සිතුවිල්ල නිමේෂයක් මෙන් මගේ සිතට ඇතුළ් වූයේය.  එවැනි සිතිවිල්ලක් පහළ වීමට මගෙත් කාළයක් තිස්සේ වර්ධනය වු යම් මානසිකත්වයක් බලපාන්නට ඇත.නමුත් එය කුමක්දැයි මේ කතාවට වැදගත් නැති බැවින් නොලියමි.නමුත් එය හුදු සිතුවිල්ලක් නොව.සැබවින්ම එය ඉවකි.මට ඇති වූයේ වඩාත් ප්‍රබල ඉවක් බව මට පසක් වූයේ අපගේ උසස් පෙළ ප්‍රතිඵල ලැබී පාසලට ගිය අවස්තාවේදීය.ඇත්ත වශයෙන්ම ඇය වාණිජ අංශයෙන් දිස්ත්‍රික්කයේ ප්‍රථම ස්ථානය ලබා ගෙන ඇත.මෙය විය හැකිද?තමන් කිසිදාක කතාබහ කර නැති හැඳිනගෙන නැති හුදු ජනප්‍රිය චරිතයක් වීම නිසා ඇස් මානයේ දර්ශනය වූ කෙනෙක් ගැන මෙවැනි අනාගත වාක්‍යයක් ඇති වීමත්,එය එලෙසම සැබැ වීමත්.නමුත් මා එය ඒ මොහොතේ තේරුම් ගැනීමට උත්සහා නොකළද මේ සිදුවීම තවත් වසර හයක් ගතවනතුරුත් සිතේ කොනක තැන්පත් වී තිබුණි. නමුත් මෙතුවක්කල් එය දන්නා එකම පුද්ගලයාද මම වෙමි.ඇයටවත් මේ බව කිව නොහැක්කේ ඇය එය කොහොමටවත් විශ්වාස නොකිරීමට ඇති ඉඩ නිසාය.

නමුත් මා ඇය සමඟ යම් සන්නිවේදනයක නිරත වී ඇත.එය සිදු වූයේද හරි අපූරු විදියකටය.මෙතැන් සිට දිග හැරෙන්නේ මා ඇයට පෙම් කිරීම දක්වා වූ ගමන පිළිබඳවය.ඈ හොඳ කවිකාරියකි.මූණුපොතෙහි ඈ විසින් පළකරන ලද කවි නිසදැස් ආදිය මා කිහිප විටක්ම යළි යළිත් පරික්ෂා කරමි.ඈ විසින් පළකරන ඡායාරූප,ඒවාට ඈ ලියන කවි ආදිය කියවීමෙන් පසු කෙමෙන් කෙම මා විසින් ඇගේ ඇතුළාන්තය අනුමාන කිරීමට වෙහෙසවනු ලැබීය.පාසල් කාලයේ මා ඇගේ බාහිර හැසිරීම නිරීක්ෂණය කළෙමි.දැන් මා ඇගේ අභ්‍යන්තර හැසිරීම නිරීක්ෂණය කරමි.මෙසේ සිදුවීම හරහා මා නොදැනුවත්ම මාව කිසියම් නැවුම් අවකාශයකට කැඳවා ගෙන ගොස් ඇතැයි මට සිතේ. මට දැන් ඇය සමඟ කතා කිරීමට අවශ්‍යය.ඒ සඳහා සුදුසුම නිමිත්තක් සකසා ගැනීමට මට හැකි විය.
මා ප්‍රියකරන ඒ වගේම ඇයද ප්‍රිය කරනු ඇතැයි මා සිතූ එක්තරා මූණුපොත් පිටුවකට මම ඇයට ආරාධනා කළෙමි. එලෙසම ඇය ඒ ආරාධනාව පිළිගෙන තිබුණු අතර එතැන් සිට කිහිප විටක්ම මට ඇය සමඟ යම් අදහස් හුවමාරුවක් කර ගත හැකි විය.මා වත්සලා සමඟ නිතර නිතර අදහස් හුවමාරු වන්නේ ඊටත් ටික කාලයකට පසුව වේ.

ඉතාම අවංකව පවසන්නේ නම් මා මෙලෙස ඇය සමඟ මූණුපොතේ චැට් එකකට සෙට් වෙන්නේම ඇය කෙරෙහි හටගත් යම් ආලයක් නිසාමය.එය නැහැයි කියා පැවසීමට මා කිසිලෙසකත් උත්සහා කරන්නේ නැත.තවද එම ආලය හටගත්තේ කවර තැනකින්ද කියා නිශ්චිතව පැවසීමට මට නොහැකිය.මුලදී ඇගේ කවිබස ගැන ඇරඹී ඒ සංවාදය ක්‍රම ක්‍රමයෙන් කාලනුරූපීව මට අවැසි මාවත වෙත යොමු කරගැනීමට මට හැකියාවක් තිබිණි.එය ඇගේ පැත්තෙන් බැලුවොත් යම් වංක ක්‍රියාවක් ලෙස කෙනෙකු පැවසීමට ඉඩ ඇත.නමුත් මා එය ප්‍රතික්ෂේප කරමි.මක්නිසාද යත් ඇය කෙරෙහි හටගත් ආලවන්ත බව ව්‍යාජයක් නොවන බව මට ඉඳුරාම විශ්වාස බැවිනි.නමුත් මෙය මූණුපොතේ චැට් එකක් හරහා ඇයට සෘජු ලෙස පැවසීමට මට දහිරියක් ඇතත් මට එය එතරම් ගෝචර දෙයක් නොවේ.එබැවින් මගේ උත්සහාය වූයේ දිනෙක ඇයව මුණගැසී ඇයට මේ බව පැවසීමටය.

දිනයක මතුදා ඔබ හමුවන්නට සිත නිබඳව මගේ බලා සිටියි
සුහද ලෙසින් දෙහදක් හමුවන්නට ඔබ ආවෝතින් හරිම අගෙයි

ඒ මගේ සිතේ නිතර රැඳි පද දෙකකි. ඇය හමුවීමට මඟක් කෙලෙස නම් පාදගන්නද යන කල්පනාවේ බොහෝ කළක් නිමග්න විය.ඇයව මට අහම්බෙන් හෝ බසයක,දුම්රියක මුණගැසෙනවා නම් මට විටෙක සිතේ.මෙසේ කළක් ගත වීමට ඉඩ හැර මා කිසියම් නිශ්චිත තීරණයක් ගත්හ.එනම් මට ඇයව මුණගැසීමට කැමැත්තක් ඇති බව ඇයට පැවසිය යුතුයි යන හැඟීම මට ඇති විය.

සිතාගත් පරිදිම සුදුසු යැයි හැඟුණු යම් මොහොතක මම ඇයව මුණගැසීමට කැමැති බව දන්වා පණිවිඩයක් යැවීය.පිළිතුරක් ඇය එවා තිබිණි.එනම් ඒ මොකෝ හදිසියේම එහෙම කල්පනාවක් ආවේ යන්නයි.එය සැබවින්ම හදිසියේ පහළ වූ සිතුවිල්ලක් නොවන බව මම දනිමි.එය කාළයක් පුරා සිත්හි දරා සිටි කල්පනාවකි.නමුත් මා ඇයට ඒ බව නොපවසා එය ඉතා සාමන්‍ය හැඟීමක් යැයි දනවන හාස්‍ය මුසු පිළිතුරක් යැවීය.පැය භාගයකට පමණ පසුව පිළිතුරු ලෙස ඇයද හාස්‍ය මුසුකෙරු ප්‍රතිචාරයක් එවීය.එහි වූයේ හමුවීමට නොහැකි බවය! 

මාස ගණනක් අඛණ්ඩව අප දෙදෙනා අතර වූ සන්නිවේදනයේදී මා හැකිතාක් ඇගෙන් යම් යම් දේ ඇසූවද ඒවාට ඇය පිළිතුර දීම විනා එතනින් එහාට ගිය සංවාදයක් ඇය තුළින් ප්‍රකාශ නොවුණු තරම්ය.එසේ සිදු වූවා නම් ඒ වරක් හෝ දෙවරක් පමණි.එයින් ගම්‍ය වන්නේ මට ඇය සමඟ කතා කිරීමට වුවමනාව තිබුනද වත්සලාට මා සමඟ කතා කිරීමට එතරම් රුචියක් නොවුණු බවද?ඒ නිසාද ඇය මට එවැනි පිළිතුරක් දුන්නේ?මා ඇය කෙරෙහි බලාපොරොත්තුවක් තිබෙන බව ඇඟවෙන දේ කතා කළද ඇය ඒවා නොදැනුනා සේ සිටියාද?මේවා වැඩකට ඇති ප්‍රශ්නද?මා ඇයට ප්‍රේම කළද අඩුම වශයෙන් ඇයට මාව මුණුගැසීමට  තරම්වත් වටින් නැත්නම් මම ඇයට ප්‍රේම කරන බව පැවසිය යුතුද?
තනිකඩ කොල්ලෙක් තනිකඩ කෙල්ලෙක්ව මුණගැසෙන විට වැරද්දක් වෙන්න ඉඩ තියෙනවා යනුවෙන් ඇය පසුව කීවාය.එබැවින් මේ කතාව අප නවත්වමුද යැයි ඇය කීවාය.මෙතෙක් කළක් මා ඇය සමඟ කතා කළේ එකම කතාවක් බැවින් ඇය කියනවා නම් ඒ කතාව නවත්වමුයි කියා මා තවදුරටත් කෙසේ නම් කතා කරන්නද?කුමක් නම් කතා කරන්නද?

අද කතා නැතිද සිත සිටි තැන එලෙස තියෙනවා
ඔබේ කතා මතකය මට සුවය ගෙනෙනවා


ඒ මගේ අතින් ටික දිනකට පසුව ලියැවුණු පද දෙකකි.මම තවමත් ඇය අවසාන වතාවට කියූ තනිකඩ කොල්ලෙක් තනිකඩ කෙල්ලෙක් හමුවීමේදී සිදු වීමට ඉඩ ඇති වැරැද්ද කුමක්දැයි  කල්පනා කරමින් සිටිමි!